Landeyjahöfn og lausnir á vandamálum hennar hafa lengi verið mér hugleikin. Ég vil varpa hér fram mínum hugmyndum að næstu skrefum til úrbóta á Landeyjahöfn. Eðlilegast fyndist mér að samgönguráðherra myndi skipa óháða aðila í þetta verkefni.

Jafnframt að sett verði nægilegt fjármagn í það til að rannsaka með óyggjandi hætti hvort hægt sé að bæta aðkomuna að höfninni. Fyrir mér eru það þrjú atriði sem hafa þarf í huga í þessari úttekt og eru þau eftirfarandi:
•Í fyrsta lagi er hægt að brjóta niður úthafsölduna á rifinu framan við höfnina.
•Í öðru lagi, finna lausnir á sanddælingu framan við hafnarmynnið. Takist að brjóta niður úthafsölduna skapast aðstæður til að vinna við dælingu framan við hafnarmynnið.
•Í þriðja lagi að þessir aðilar fái rúman tíma eða allt að 12 mánuði og skili síðan skýrslu þar sem komi fram hvort og þá hvernig hægt sé að bæta nýtingu Landeyjahafnar.

Ég tel nauðsynlegt að fengnir verði nýir óháðir aðliar til að hafa yfirumsjón með þessari vinnu og hafi (nefndin) heimildir til að kalla að alla þá aðila sem þeir telji að komið geti að gagni. Þar með talið alla þá reynslu og þekkingu sem siglingasvið Vegagerðarinnar býr yfir. Yfirumsjón verður ávallt að vera í höndum óháðra aðila, sem ekki hafa komið beint að verkefnum Landeyjahafnar áður.

Haustið 2010 var öllum ljóst að um verulegt vanmat sérfræðinga á öllum aðstæðum við Landeyjahöfn var að ræða. Einnig var um að ræða verulegt ofmat sérfræðinganna á eigin þekkingu, sem og getu til að standa við fullyrðingar varðandi höfnina og er staðan við höfnina því miður óbreytt nú 8 árum seinna.

Það er ekki góð stjórnsýsla að framkvæmdaaðili taki út eigið verk, þess vegna þurfum við óháða aðila til að stjórna slíkri vinnu héðan í frá.

Við þurfum að fá svör við því hvort hægt sé að gera þessa höfn að því sem okkur var lofað!

Einnig legg ég til að Vestmannaeyjabær hafi frumkvæði af því og fari strax í það að fá aðila sem eru að reka og smíða afkastamiklar ferjur eins og t.d háhraðaferjur. Fá þá til að skoða aðstæður hér og koma með tillögur að rekstri slíkra ferja, telji þeir það mögulegt.

Verum stórhuga Vestmannaeyjum til heilla. Leitum til þeirra sem reka og smíða fullkomnustu og afkastamestu ferjurnar. Leitum að raunverulegum lausnum og höfum frumkvæðið í okkar höndum.

Fyrir Heimaey.

Þar sem hjartað slær.

Sveinn Rúnar Valgeirsson.

Höfundur skipar 6. sæti á lista Fyrir Heimaey í komandi sveitarstjórnarkosningum.